ÝEKEJE HOŞ SÖZE TOÝ TUTÝAR GÖWÜN

ÝAŞLYK

Agşamara ýakasynda akaryň

Ýaş oglanlar aýdym aýdýar ýuwaşja:

“Dostlarmyň ýüzüne niçik bakaryn,

Mährim siňen dünýäm menden sowaşsa.

Ýadaw Aý bir ýerde düşlär, irkiler,

Baharyňky bolup, gyşyňky bolup.

Bu aýdymlar goýmaz seni erkiňe,

Düýşüňe girerler pyşyrdy bolup.

Şat günüň ähli zat göwnüňi gozgar,

Başyňda ýaglygyň kakar heşelle.

Köp gama batýarsyň Akmaýa bozlap,

Ak gijeler öz ýolundan geçende.

Ýazlar güli bilen, gyşlaram garly,

Köller hanasynda, guşlar agaçda.

Gaharlanma, meniň ýazygym barmy,

Şolary arzylap söýmeden başga?

Iller şeýle diýýär: ýaşlykda batan

Tiken ulalanda azar berýändir.

Seniň arzuwyňda çaýkanyp ýatan

Bu gözlerim guramajak derýaňdyr.

Sensiz bilmen toprakdygym, daşdygym,

Doglaryn men öz dünýäme gowuşsam...”

...Agşamara sudury deý ýaşlygyň

Ýaş oglanlar aýdym aýdýar ýuwaşja.

OBADA

Giň jahanyň huzurynda arzym ýok,

Aýdym ýetdi, şapak ýetdi, nur ýetdi.

Bu dünýede şundan zerur harjym ýok,

Ýokdur sust bolmaga köňlümiň hetdi.

Gezip ýörseň alabahar mysaly,

Arasynda aýdym ýaly baglaryň.

Parhy ýok gözýetim ýaşylmy, sary,

Şudur gök asmana şärik çaglaryň.

Şu hazynam bilen ýollara siňip,

Gyrawly daňdanyň ýylysyn syzdym.

Bulutlar uludan dem alsa diňip,

Adama çalymdaş gylygyn syzdym.

Söýenimi söýüp ganabilmedim,

Bu baky teşnelik bolmaga çemli.

Ýekeje hoş söze toý tutdy göwün,

Döwletli öý eken adamyň köňli.

Soňam şeýle bolar,

Ýetilmez çene,

Ýüregime täze-täze göç iner.

Razy bolaryn dünýeden ýene

Bir pursatlyk gar-ýagyşy üçinem.

Ýaz bilen toý tutup, bezener erik,

Bulut ýeňlär gider göz edip ýele.

Ýagyşdan soň bagyň aglanyn görüp,

Men onuň ýanyna gelerin ýene...

Awtory Mämmetnazar Babanazarow.