Anonim internet ulanmak ýa-da proxy server-ler

Men seniň monitoryň arkasynda eliň rezin ellikli, ýüzüň maskaly, stoluň aşagyndan jyklap syçanyň we klawiýaturanyň dügmelerini basyşyňy görýärin. Kompýuteri ulanyp bolup, hatda ony öçeniňden soňra klawiýaturalaryňda barmak yzym galandyr diýip olary süpürişdirişiňi hem görýärin!
Aý, nätdiňaý, monitora gözüňi petiredip bakmasana, men arkaňda durun ahyry...

Howwa, dogrudan hem meniň arkaňda ýoklugyma garamazdan (eger arkaňa seredip görmedik bolsaň, gözüňi aýla, belki... ), ýaňky aýdyşym ýaly meniň ýakynyňda ýoklugyma garamazdan eger siz internet ulanýan bolsaňyz siz hakynda käbir maglumatlary şonsuzam bilýän. Nähilidigini ine aýdyp bereýin:

Internetde maglumat alyş-çalyşygy “client - server” ýagny “müşderi – hyzmat beriji” görnüşinde amala aşyrylýar. Müşderi özüne nähili faýl, sahypa we ş.m. gerekdigi hakynda hyzmat berijä soragnama ugradýar we hyzmat beriji hem müşderiniň islän faýllaryny onuň kompýuterine iberýär. Has anygyrak aýdanymyzda müşderi öz isleýän faýlyndan daşary hem goşmaça özüniň kompýuteri hakynda käbir maglumatlary, özi bilmezden hyzmat berijä ugradýar.

Ol maglumatlar ine şular:

- iş ulgamyňyzyň ady we onuň wersiýasy (göýberilişi) (meselem: Windows XP SP2 070227-2300)
- web browseriňiziň ady we onuň wersiýasy (Microsoft Internet Explorer 8.0.6001.18702)
- web browseriňiziň aýratynlyklaryny (ekranyň reňk çuňlugy (1024x768, 32 bit), java ýa-da java script goldaýamy ýa-da ýok we ş.m.)
- müşderiniň ýagny siziň IP salgyňyz (meselem 194.85.1.1)
- iň soňky giren web sahypaňyzyň salgysy (meselem www.teswirler.com )
- kompýuteriňiziň ady ýagny iş ulgamyňyzy gurnanyňyzdaky ýazan adyňyz
- ISP (Internet Service Provider) ýagny Internet Hyzmaty bilen Üpjün edijiňiziň ady (meselem tmcell)
- siziň maddy ýerleşýän ýeriňiz

Bu maglumatlary webmaster-lerden başga-da hakerler hem siziň kompýuteriňizi ele geçirmek üçin ulanyp bilýärler.

Bu ýagdaýdan goranmak üçin bolsa iň gowy çykalga hem proxy server-lerdir, ýagny anonim hyzmat berijiler.
Proxy server-i ulanyp internede baglananyňyzda, haçanda bir sahypany açjak bolsaňyz ilki bilen bu islegiňiz öz ISP-ňyza (Internet Hyzmat Berijiňize) bagly bolmadyk daşky hyzmat berijä iberilýär we onuň üsti bilen hem aňyryk ýagny web sahypany üpjün edijä ýetirilýär. Bu işiň dowamynda proxy server-siziň ýokardaky ýazylan maglumatlaryňyzy özüniňki bilen çalyşyryp ýetişýär we aralykda siz anonim ulanyjy höküminde galýarsyňyz.

Iki görnüşli proxy server-ler bolýar. Web esasly proxy server-ler we internet browser-iňize gurnalýan proxy server-ler.

Web esasly proxy server-leriň ( http://www.anonymizer.com proxy server-ini mysal getirip bileris) işleýişi şeýleräk: haçanda bu görnüşli proxy server ulananyňyzda bir sahypa girjek bolsaňyz her gezek proxy server-iň web sahypasyna girip, şol ýerdäki degişli görkezilen ýere girjek bolýan web sahypaňyzyň salgysyny ýazyp şonuň üsti bilen girmek. Bu hereketiňizi her gezek täze bir sahypa girmek isläniňizde gaýtalamaly bolýarsyňyz. Başga-da proxy server-leriň artykmaç ýüklerine şuny goşup bileris: proxy server-iň üsti bilen giren sahypalaryňyza goşmaça mahabatlaryň (reklama) goşulmagy, bu hem proxy server-lere goşmaça gazanç diýip düşünip bileris, olar hem eden işiniň hakyny almaly ahyry.

Ikinji görnüşli proxy server-ler hem web browser-imize gurnalýan proxy server-lerdir. Bu görnüşli hyzmaty ulanmak üçin ilki bilen ol proxy server-iň adyny we onuň ulanýan port nomerini bilmek hökmandyr. Buny hem degişli hyzmat berijiniň web sahypalaryndan bilip bilersiňiz. Haçanda gerekli maglumatlary alanymyzdan soň meselem Internet Explorer-de ulanmak üçin Service (Сервис - Hyzmat) menýusyndan Browser settings (Свойства обозревателя – Browser-iň aýratynlyklary) saýlaýarys ondan hem Connections (Подключения - Baglanmalar) ondan hem Settings (Свойства – Aýratynlyklar, düzümi) dügmesine basýarys, garşymyza çykan penjireden Proxy server diýen bölümindäki degişli ýerleri (proxy server-iň salgysy we onuň ulanýan port belgisini) ýazýarys we OK dügmelerine basyşdyryp işi tamamlaýarys. Bu düzeltmeler her web browser-de (Opera, Google Chrome, Fire Fox we başgalar) azajyk tapawutly bolmagy mümkin, ulanýanlar aşakda teswir görnüşinde ýazyp bilerler.

Häzirlikçe şu maglumatlar bilen kanagatlanalyň, eger isleseňiz towşanyň hinine has çuňňur hem aralaşyp bileris.

Towşanyň hininiň çuňlugyny bilmek isleýärsiňizmi?

Näme maňa ertekilerdäki Alisa-dyr öýdýäňmi?(0%, 0 adam)

Howwa, getir gök tabletkaňy!(68%, 11 adam)

Aý, meňa gök tabletkalara alergiýam bar :P(0%, 0 adam)

Ýokardaky ses berilişiklere düşünmedim, ýöne ýazgyň dowamyny isleýän.(31%, 5 adam)