Pikriň bolsa OKA!

“Her kim gözleýänini
tapar”, hatda “tapýandyram” diýýäler. Käşkä hakykatdanam şeýle bolsady. Ili
bilmedim, ýöne özüm-ä “gözleýänimi tapdym” diýip bilemok. Saçymyň garasyndan
agy köp. Öz-özüme: “Şu wagta çenli tapmadyk bolsam, indem tapjak bolup
ýörmegimiň manysy bir barmyka-da” diýýän. Aslynda ony tapsam kaýyl, iň soňky
demimde bolsa-da... 

Ýa-da gözleýnligim
ýalanmyka? Goşgy ýazjak bolup derde galyp, küplet sanyny köpeltjek bolup
oturanyň boş setileri, boş kapyýalary gözleýşi ýalymyka meňem “gözleýän” diýip,
gözleýänlerden bolan bolup ýörşüm. Eger şeýle bolsa nokady goýaý. “Nokady
goýaý” diýmek diliňde aňsat, hany goý-da goýup bilseň, nokat goýdummykam
diýersiň welin, şol tersotur bolar gider oturar. Oturyp bilsem ters oturmaga-da
kaýyl, emma bu dogup-ýaşyp duran Gün hatda ters oturmaga-da goýanok.

Ýa-da meniň gözleýänim
gözleýänim dä-de, onuň öňündäki päsgelçiliklermikä? Men güli däl-de, tikenini
gözleýämikäm? Güle uzan barmaklarymyň tikene çümüp awunmasyna aşykmykam?
Aýdylypdyr-a maksatdan maksada barýan ýol has ýakymly, gyzykly diýip. Onda men
seniň ýeriňe gyzygy gözleýamikäm? Maksadym tapmak däl-de gözlemek maksadymmyka?


Ýa-da bu dünýe
tapylýan däl-de diňe gözläp ötülýän ýermikä?

Ýa-da ol tapmak üçin
däl-de ähli zady ýitirmek üçin gözlemelimikä? Özünden başga ähli zady ýitirmek
üçin...

Ýa-da maňa gözledýän
nebsimmikä? Jelaleddin Rumy “Nebsiň bilen maslahat etseň, o pisiň diýenlerine
uýma, tersine et. Hatda saňa namaz oka, oraza tut diýip emir etse-de, nebis
hilegärdir, şeýle emir bilenem bir hile gurjak bolýandyr” diýýä.

Bir ýerlerden enäň
hüwdüsi gelýä. Hüwdi diýlen gözleýänini tapanyň aýdymy bolmasa, bäbege-de, saçy
agaran garra-da şeýle ýakymly bolmazdy. Ene gözleýänini tapypdyr. Ony berk
gunnap, gujagyna gysypdyr. Bäbegiňem myslapjyk ýatyşyna, rahatlygyna seretseň
gözleýänini tapana meňzeýär. Ýa-da menem bir wagt, bäbekkäm tapyp soň, ulalyp
ýitiräýdimmikäm? Ýok, eje, men seni gözlämok. Seň dünýeden gideniňe edi ýyl
boldy, ýöne sen dünýeden gitdiň, meň ýanymdan gitmediň. Eje-kaka diýlen öleni
bilen perzendini taşlap gitmeýä. Ölümiň oňa güýji ýetmeýä. Aslynda Ezraýylyň oň
bilen işem ýok bolmagy mümkin...