KÄBIR AÝDYMLARA
Bu ýeňles aýdymlar kalby suwarmaz,
Oýnaşardan has edepli jahanda.
Olar daýhan bilen ak bugdaý ormaz,
Köşeşdirmez şowsuzlyklar ýakanda.
Sörtük deý ýakymsyz hem göwnüýarym
Aýdymdan guş sesi ýakyndyr köňle.
Aýdymçy, men saňa ynanmaýaryn,
Goý, sen zarynlaber, "söýýän" diý, iňle.
Seleňligi, rahatlygy söýüne,
Togap edip tolkunşyny maýsanyň,
Agşam dolanamda toý dek öýüme
Ýeňles aýdym däldir meniň küýsänim.
Ýa-da durmuşyňa guwanyp, ine,
Otyrkaň köňlüň çag, ýüregiň gorly,
Goşulyşyp akar suwuň sesine,
Diliňe gelmese, aýdym bolarmy?!
Öz ýakyn zadyndan göwünler ürkmez,
Bir günä bolandyr gatasa ýeňse.
Heý, çydap bilermi aýdymhon türkmen
Aýdym adamlaryň göwnüne degse.
Mydam gezjek bolup aýdym sanynda
Gülse, çygylsa-da ýalaňaç heňler,
Bu çynlakaý adamlaryň ýanynda
Güýmenje barynyň hallary teňdir.
MÄMMETNAZAR BABANAZAROW.
Arhiwiň ýagdaýy
● Doly tekst
● 24/24 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 26 oktýabr 2011 ý. · Asyl sahypany gör ↗
Teswirler 24
DÜÝŞ
Gözüň ünjüsini ýürege guýduň,
Şonda asman ýa goňrasdy, ýa sary.
Arada düýşüme giripsiň - diýdiň -
Katdyň ýaýa meňzeş eliň hasaly.
Öz-özüňden ynjan ýaly gyýylyp,
Sen öz sözleriňe tisgindiň, naçar.
Gussamy gizledim, diýdim: Söýülip,
Ýigit bar ömrüni nowjuwan ýaşar.
Şo pursat özümem ynandym şuňa,
Mydam ýaş gezerin, gezerin jahyl.
Ýüregmiň owsunşy galar bolşuna,
Ýigdelerin daňlar çyzylan çagy.
Ýöne biraz sust geçirin gyşlarmy,
Toýlarda syçyrap gözüňe ilmen.
Seniňem şapak deý ýylgyryşlarňy
Owadan baharlar gaýtalap bilmez.
Bu ünji bedene ornaşar assa,
Köňlüme ýazylar güýz gyrawy deý.
Hem igenç eşderin bulara üste:
Indi sen eşigiň ýylyragyn geý.
Ine onsoň saza meňzeş bir agşam
Hol meýdanda gezip gysylyp gerden,
Telwasym gaýdyşar, joşum durugşar,
Hem ýeke gijede garraryn birden.
Ýürek bir zat syzyp, ýetişip daňa
Öýňüzden çykaňda umyt mysaly.
Ýagşy niýet bolup duşaryn saňa
Katdym ýaýa meňzeş, elim hasaly.
MÄMMETNAZAR BABANAZAROW.
dogry!
Gowy goshgy kab aga! Minnetdar!
Ikinji goşgy nähili eken?
GUTARYLMADYK GOŞGY
Bu dünýede didaryňy görme ýok,
Sataşmak ýok ikimize hiç haçan.
Oglum! diýip, gujagyňy germe ýok,
Senden gök asmany gabandy ajal.
Ah, seni şeýle bir göresim gelýär,
Bir alaç gözleýän bagrymy tüýdüp.
Iň bolman düýşüme girsene, käbäm,
Öňki ynjyklygmy birmahal goýdum.
Delminip-delminip gitme yzyňa,
Ýaýdanyp ukymyň goýalmagyndan.
Maňa birje gezek dözümlilik et,
Çekinme tisginip oýanmagymdan...
MÄMMETNAZAR BABANAZAROW.
ikinji goshgam gowy eken! Yone 3-nji goshgyny hasam haladym!
Tuweleme Kab sheyle goshgulary yene bizin bilen paylasharsyn diyip umyt etyan goshgylan hemmesi bir-birinden gowy Saggg boooooooooool!
Ok
MÄMMETNAZAR BABANAZAROW - ilkinji gezek eşitsemem, bet ýazar ekenaý... hany dowam, ýene bar bolsa ýelmäbergin
Kän. Mende üç kitaby bar. Ýene ýazaýynmy?
hakyky :-)
yazsana agam esasanam ene hakda bar bolsa🙂
Bu gije negözel asman keşdesi,
Utanyp baglara siňipdir tümlük.
Ýöne bilmen şatlyk pasly geçdimi,
Göwnüme gam-gubar giripdir sümlüp.
Hut ýaňy bir gyzyň gözüniň ýaşy
Aýyň ýagtysyna buldurap gitdi.
Ýüregimi gyýyp, owadan naşy
Ykbal gijelikde gözümden ýitdi.
Adamlar derýadyr goşar özüne,
Kenarlarda ýitip gitmez ýaňky dür.
Ýöne gussa degdi birniň ýazyna
Hemem bir göwüniň bir künji boşdur.
Dostuň ýada düşýär gözleriň solsa,
Adam bir-birine şatlykdyr, gamdyr.
Eger dünýämizde boşluk bar bolsa,
Tapylmadyk ýa ýitirlen adamdyr.
MÄMMETNAZAR BABANAZAROW.
Belki şeýle bolmak takdyrda bardyr
Diýip, gara gözleriňi ýaşlama.
Takdyr biz ikimiz sygardan dardyr,
Takdyr däldir urulmaklyk daşlara.
Bagtyna öwrülýär adamyň erki,
Egrelip ösmegin, eý, meniň şaham.
Şor suwly käsäni saňa kim berdi
Süýjülik suwuna teşnekä dahan.
Gazlaryň sürüsi geçer sallanyp,
Ýellenen gabagyň ýelpär giderler.
Durmuşa wepaly bolanda anyk
Ysgynsyz pikirler selpär giderler.
Güýçli däl, akylly bolany üçin
Tebigat adama ynanýar şeksiz.
Tükenmez utanja goýarsyň meni
Ýazlaryň öňünden gözýaşly çyksaň.
Aý bize egnini deňlär ýene-de
Gör, kölüň üstüne ýyldyzlar ýagdy.
Ýaňy ýylgyranda garry ene deý
Agladyp ýörmegem bolarmy bagty?!
Men beýle takdyra bermerin seni,
Şatlykdan demimiz tutulsyn gitsin.
Döwülen küýze deý zyňarys ony,
Goý, bagtyň ornuna aglasyn ýatsyn.
MÄMMETNAZAR BABANAZAROW.
Ezilip, çoýunyp görmedim oda,
Ýaz deý çagajyga habar gatmadym.
Uzakda mes bolup göterdim bada,
Goňşymyň öýünden habar tutmadym.
Bilmedim jahanda myradym nedir,
Söýenim ýok,
Bardy diňe halanym.
Ýatsaň-tursaň kellä geljek zatmydyr,
Öz kerwenmi öz-özümiň talanym.
Maňlaýyňa tygyň ujy degen deý,
Ýokdy almaz sözün ýüzüme çeken,
Indi muňa mertebäm diýp begenme,
Diýmek, meniň eziz dostum ýok eken.
Ýüpek şöhle bilen gözümi açan
Gündizim öýläne hyýal edipdir.
Güýzlerde miwesi şemala gaçan
Daragtym bireýýäm garrap gidipdir.
Gaýtgyn yz goýupdyr çyrpynan ýaba,
Men bu säher il bilenmi, ýekemi...
Ilki oýun edip, soňundan, toba,
Ömrüň geçip gidiberjek ekeni.
MÄMMETNAZAR BABANAZAROW.
agam owadan goşgulary paylaşanynyz ucin ellerinize guller bitsin
okap dunyam ginap gitdi, janyg sag bolsun kab aga, seyle gosgulary koprak yazaweri
bet goshgular..👍
Kab aga minnetdar! gowy goshgular yazypsyn!
Kab aga minnetdar! gowy goshgular yazypsyn!
Sag bol