Sen ýok :'(

Sen ýok, bir gün gadryñ bilner,
Sen ýok, ýürek-bagrym dilner...
 
El telefonynda ýañlanan aýdym sesi ýol ulagynda oturanlaryñ ünsüni özune çekdi. Gapdalymda oturan bugdaýreñk gelin sumkasyndaky telefony almaga durdy. Ýöne gürleshjegini-gürleshmejegini bilmän ýaýdandy. Aýdym setirleri ikinji gezek ýañlanyp ugranda, ol telefonyñ gyzylja düwmesini basyp göýberdi. Gelniñ okara gözleriniñ owasy ýasha dolup, iki damja gözýash elinde saklap oturan gaýysh sumkasynyñ üstüne gaýyp düshdi. Egni egnime degip duransoñ, onuñ aglaýanyny duýup durdym. Elini aýama alyp, sessiz kösheshdirip ugradym. Uzak dymyshlykdan soñ gelin ýüregini açdy...
 
          - Men oba gyzy. Shäherde ýashaýan Begenç diýen oglan bilen tanyshdym. Tanyshlygymyzyñ soñy söýgä ýazdy. Biz durmush gurduk. Begenjiñ yzyndan ýene-de öýlendiräýmeli üç sany inisi bolansoñ, gaýynlarym toýdan soñ uzak saklaman, bizi kireýine alnan jaýa göçürdiler. Ýoldashymyñ gurlushykda ishläp alýan zähmet haky zordan iýip-içmegimize ýeterdi. Geýim-gejim ýatdan çykarypdyk. Obada çörek ýapyp, dürli tagamlary bishirip ýöremsoñ, men Begenje gutap bishirip, bazara çykarmak baradaky pikirimi aýtdym. Golaýymyzdaky bazara gatnap ugradym. Her gün täzeje etden taýýarlanan datly gutaplara isleg bildirýän köpeldi. Girdejimiz artyp ugrady. Bir gün Begenç kärendesine ýer alyp, kiçijik ash'hana gurup bermekçidigini aýtdy. Jaý salynmaly ýeriñ resminalaryny düzedip, ishe girishdi. Ol gündizine ishe gidip, gijelerine kerpiç örerdi. Menem ýanynda bolup ol-bi ownuk ishlerine kömeklesherdim. Sheýdip, üç aý diýende jaý galdyrdyk. Artykmaç çykdajy etmejek bolup, shonuñ içinde ýatyp-turara-da shert döretdik. Indi biziñ öýümizem, meniñ ish ýerimem ash'hana üçin salnan jaýyñ içindedi. Kynçylykly günler bizi has-da ysnyshdyrdy. Biri-birimize direg bolup, ol günleri ýeñip geçdik. Özbashymyza jaýly bolduk. Ýöne bäsh ýyldan gowrak bile yashashyp, nämeüçindir perzende ýüzümiz düshmeýärdi. Ähli barlaglardan geçdik, düýpli dert tapmadylar. "Çile düshendir" diýip, türkmen emlerinem etdik. Peýdasy bolmady. Ahyr bir gün lukmanlaryñ biri Mollagara shypahanasyna gitmegi maslahat berdi. Shypahana ýerleship, gowy arzuw-niýetler bilen ýañy bir bejergi alyp bashlapdyk.
 
          Bir gün naharhanadan çykan ýerimizde synpdashym Gurbana gabat geldik. Gurban häsiýeti boýunça ulugyz ýaly mylaýym oglandy. Mekdepde wagtymyz ol köplenç gyzlaryñ arasynda gezerdi. Gyzlar ony öz joralarynyñ biri ýaly kabul edip, ýanynda her-hili gürrüñlerem aýdyshardylar. Biz joralar bolup dushushanymyzda ogshashyp salamlashsak, olam gyzlaryñ ýañagyndan ogshap galardy. Gyzlar ony bolmalysy ýaly kabul ederdiler. Orta mekdebi tamamlanymyza 8 ýyl geçenem bolsa, Gurbanyñ shol bolshudy. Ol meni göreninden ylgap gelip, iki elini egnime goýup, ýañagymdan ogshady. Men töwerekden utanyp ashak bakdym. Begenç welin gahardan ýarylaýyn diýip, gözleri bilen meni iýäýjek bolýardy. Gurban bilen saglyk-amanlyk sorashmaga-da maý bermän, ol meniñ ýeñimden çekip bolýan otagymyza alyp girdi. Düshündirjek boldum. Diñlemedi. "Seniñ bilen öýde geplesherin" diýdi-de, gaýdyp sesini çykarmady. Biz doly bejergimizi alyp öýe dolandyk. Adatdaky ýaly her kim ishli-ishi bilen boldy. Ýöne Begenç agsham öýe dolanmady. Men onuñ el telefonyna jañ etdim. Almady. Ertesi gün ýene-de aýladym, almady. Ahyrynda "Ýürege düshdüñ" diýýän ýaly telefonyny öçürip goýdy. Sheýdip, iki aýa golaý wagt geçdi. Bir gün gutap bishirmekçi bolup durkam, ýüregim bulanyp, erbet boldum. Bu ýagdaý soñam gaýtalandy durdy. Ýanymdaky kömekçi gyza ishleri tabshyryp, lukman görünmäge gitdim. Lukman barlagdan soñ meniñ hamyladygymy aýdyp gutlady. Hem begençden, hem gynançdan ýañaklarymdan akýan gözýashlarymy saklap bilemokdum. Bu habary Begenje bushlasym geldi. El telefonyna aýladym. "Al-ýo, kim gerek saña? Begenç ýok. Gaýdyp bu belgä jañ etme!" diýen aýal sesini eshidip, özümi ýitirdim. Shondan soñ ony idemedim. Ene bolmak arzuwymy ejem jana bushlasym gelip, shu gün ýola düshüshim. Ol Begenjiñ gideninden bihabar. Eger aýtsam, tapdan düsher diýip gorkýaryn. Onuñ ýürek keseli bar... – diýip gelin dymdy. Münüp barýan ulagymyz onuñ düshmeli ýerinde saklandy.
 
Sen ýok, bir gün gadryñ bilner...
Täze ýañlanan aýdym sesi pikir derýasyna gark bolan ýolagçylary aýñalmaga mejbur etdi. Gelin bu gezek aljyraman telefonyny açdy. Birdenem "Hiý-h, Begenç!" diýdi-de, mashyndan atylyp çykdy.