Restorana baranyňyzda…

Salam, hormatly teswirdeşler! Meniň bu günki ýazjak maslahatlarym diňe degişmedir. Belki-de biraz ýylgyryp bileris. 🙂

1. Restorana barmak üçin iň gowy eşik sport geýimleridir. Dogry-da, oturmaga amatly, stulda gaýşaryp, aýaklaryňyzy bolsa stola goýup otyrybermeli. Geýimiňiziň reňki gara bolsa-ha hasam gowy, öňki içen arzan çakyrlaryňyzyň, iýen naharlaryňyzyň yzlary bildirmez.

2. Ýanyňyzdaky gyzyň menýuny okaryna garaşmaň. Ol naharlaryň atlaryny ýeke-ýeke okaýança ajyňyzdan öläýmegiňiz mümkin ahyry! Derrew-derrewden onuň üçin hem zakaz ediň, iýesi gelmese – halanyny etsin. Ýogsamam, kim töleýän bolsa, şolam islän aýdymyny zakaz edýär-dä.

3. Eger uzak wagtlap nahar getirilmeýän bolsa diş arassalanýan bilen burnuňyzy oýnap, wilka bilen stoly çyzyşdyryp (özüňiz barada ýadygärlik bolar), salfetkalardan haýsydyr bir görnüşli şekiller ýasap bilersiňiz. Soňra bu zatlar ýüregiňize düşende bolsa, bütin zaly ýaňlandyrar ýaly edip: "O-how, meniň zakazym nirde, adamlar?" ýa-da "Näme, produkta almak üçin Afrika gitmelimi?" diýip gygyryp bilersiňiz. Dogry-da, gymyldasynlar, olar bärde owadanlyk üçin işlänoklar-a.

4. Salfetkalary ýakaňyza salyň. Şeýtmek bilen siz gaçýan iýmitden goranyp bilersiňiz.

5. Nahary getiren wagtlary, ol naharlary kontrol terezisinde çekip görmegi haýyş ediň. Bu restoran gurnaýançyjyklar, size aldajak bolýan bolmaklary mümkin. 150 gram bolmaly salatlar 144 gram çykaýsa dagy boldugy – arkaýyn skandal turuzyň!

6. Eger kolaňyzy trubkajykdan içen bolsaňyz, ony soňky damja çenli içiň! Şeýtseňiz kolanyň galyndylary "Bulk-bulk" edip owadan ses eder we zaldaky hemme kişi sizi gönümel we göwni açyk adam diýip hasap eder.

7. Eger stoluňyzda pepelnisa ýok bolsa, çilimiňizi nahardan boşadan tarelkaňyzda öçüriň. Zyýany ýok, ýuwarlar. Onsoňam, olaryň özi günäkär – wagtynda pepelnisany getirip bermediler. Siz medeniýetli adam ahyry, yogsam çilimi göni aşakdaky ýazylgy dorožka kaksaňama bolardy welin…

8.Goňşy stolda oturanlardan tarelkalarynda galan nahar galyndylaryny size bermegi haýyş ediň. Ol siziň öýdäki mallaryňyz üçin gowy iýmit bolar.

9. Hasaby getirenlerinde kalkulýator bilen ýekänme-ýekän hasaplaň. Soňra bolsa söwdalaşyp başlaň. Ulanylan produktalaryň bahasyny bilýändigiňizi, optowyda näçe durýandygyny aýdyň. Egerde ofisanta siziň gürrüňleriňiz ýaramasa, onuň başlygyny çagyryň we bu gürrüňleriňizi täzeden başlaň. Şeýtseňiz, bu ahyry olaryň ýüregine düşer we olar siziň bahaňyz bilen razylaşarlar we sizi çaltrak ugratsalar razy bolarlar.

Üns bereniňiz üçin minnetdar!