Husyt (hekaya)

gadym zamanlarda bir baý bar
eken. ol bitiniýme gysyk
bolupdyr. gapysyndaky
mallaryny – düýesini, atyny, it-
pişigini gaty hor saklapdyr.
hojaýynyň gysyklygyndan nadyl
bolan it bilen pişik öz aralarynda
dawa edipdir.
ilki bilen it gürläpdir.
- gel gaçaly, ýogsa biziň
hamymyzy serýä bu naýynsap...
- ynha görersiň, ertir hojaýynyň
aty öler – diýip, pişik
welisiräpdir. – onsoň hojaýynyň
gözüne basyp, baý, iýeris-ä...
bu gürrüň hojaýynyň gulagyna
degýär. ol haýdan-haý atyny
satmak bilen bolýar. aç
haýwanlar ýene dawalaşyp
başlaýar.
- gaçaly, dogan, gaçaly – diýip, it
açlygyndan towlanypdyr. men-ä
ölýän, halys içim goruldy.
pişik mawlapdyr:
- ýüzi gursun oň!!! ertir düýesi
ölýär. onsoň näderkä?
hemişe diňşirgäp ýören husyt
bu gürrüňem gapyp alypdyr.
şeýlelik-de, düýe bazardan
çykýar. jübüsi puldan doly
hojaýyn ýanyn-ýanyn ýöräp,
öýüne gelýär. it bilen pişigiň şol
öňki bolşumyş.
- indi-hä aňyrsy görnüp dur-la –
diýip, pişik içi tütäp duranam
bolsa ýylgyryp gürläpdir. – biler
bolsaň, men düýn bilgijiň ýanyna
bardym. ol şeýle diýdi: “seň
hojaýynyň aňry gitse üç günden
amanadyny tabşyrýar. "nähili
görýäň, şepe? – pişik heşelle
kakypdyr. – husydyň mal-
dünýesi ikimize galýar. öňünden
aýdýan: nebsiňi şaglatmagyn,
ikimiz deňje paýlaşmalydyrys".
- eý, taňrym!.. – diýip, gözleri
peträn husyt akyldaryň ýanyna
eňipdir.
- it bilen pişik meniň ölümimi
dileýär. – ol haşlap gürläpdir. –
özüň bir ýol salgy beräýmeseň-ä,
iş çatakdyr...
pähimdar başyny ýaýkapdyr.
- sen öz eliň bilen bagtyňy
ýatyrypsyň. şeýle döwletli
malyny satmaga ýürek edýän
adama men näme maslahat berip
bilerin?! at – ganatyň, düýe –
döwletiň ahyry. indi seniň
günüňe it aglar. gugaryp, sopbaş
galypsyň. pul näme, bir tokga
daşdyr-da...
husyt bady-baran aglapdyr. tiz
wagtdan soňam ýanyny ýere
berip, aradan çykypdyr.