"Ekip geçdi"

#EKIP GEÇDI
Owwal adam indi dünýa,
Bu dünýäni ekip geçdi.
Her pygamber bir kesp açdy,
Kesbin mydam edip geçdi.

Bela geldi leňber-leňber,
Doga kyldy anbar-anbar,
Öz döwründe Nuh pygamber,
Nejjar işin tutup geçdi.

Ezraýyla janyn beren,
Anyň bilen söhbet guran,
Jennet içre diri giren,
Idris köýnek tikip geçdi.

Tä Isa gelinça daýym,
Eshaby-kehf ýatar gaýym,
Hakyň ýolunda Ybraýym
Janyn oda ýakyp geçdi.

Zaty egri gönenmedi,
Asly dogrylar dönmedi,
Gurt Eýýubyň tenin iýdi,
Iblis şonça nikb geçdi.

Süleýmanyň aly jahy,
Tört ýüz gurular bargähi,
Ynsyň,jynsyň patyşahy,
Ol hem zenbil döküp geçdi,

Tur dagy diýr,düşer ýola,
Raz aýdyşar huda bile,
Asasyn göterip gola,
Musa goýun bakyp geçdi.

Kubaýs dagynyň burnunda,
Oglun tapmady ornunda,
Ýunus balygyň garnynda,
"Ente subhan"okyp geçdi.

Kengan içinde kyrk ýyllap
Gije-gündiz doga eýläp,
Ýusubyň käkilin zarlap,
Ýol üstünde Ýakup geçdi.

Hurma döräp köşk agaçdan,
El bilen Aý böldy arşdan,
Resululla ol kuraýşdan
Ne jepalar çekip geçdi.

Aldylar jennet eýwanyn,
Hak ýoldaş etdi imanyn,
Birniçe ymamlar ganyn
Kerbelada döküp geçdi.

Sözüm ýokar hak dostuna,
Kär etmez dünýä mestine,
Duşman jepasy dostuna,
Öýsüz ýerde bukup geçdi.

Magtymguly,her kim hasdyr,
Işi dergaha yhlasdyr,
Bize olardan mirasdyr,
Her dostuna degip geçdi.

(Gyzyklanyp okanyňyz üçin minnetdar!)