4-nji bap: Köwreýikli Guýusynda. Kesearkaç, Mämmet Seýidow
KÖWREÝIKLI GUÝUSYNDA
Ýandakly obasy ýazlaga çykansoň, obanyň ýaz çekenesi Köwreýikli guýynyň töwereginde otarylýardy. Guýy dört tarapy alaňlar bilen gurşalan takyr meýdanyň orta gürpünde ýerleşýärdi. Çopanlaryň goşy çarhynyň gutunlary gatan süňk ýaly agaryp görünýän guýudan salan ýoly aralykda ýerleşýär. Guýynyň başynda endik bolan iner irmän-arman urgan çekýär. Köne çarhlar şakyrdaýar, jygyldaýar. Suwçy ýigidiň hereketlerine tabyn iner, ol “Çüýw!” diýende gidýär, “Gaýt!” diýende yza dönýär. Iner her gidip gelende, suwdan dolup çykýan äpet gowanyň suwy guýynyň başynda goýlan uzyn nowa dökülýärdi.
Goşda öz işi bilen gümra çoluk körpeç ýaly edip galdyrylan sazak, çeti dikip, selin, siňren bilen basyrylan çatmadan her eline bir kündük alyp çykdy.
Meşigiň bir bujagyny çözüp, oda-tüssä garalyp giden kündükleriň ikisinem suwdan doldurdy. Üýşüp ýatan ojar közlerini kesewi bilen eýläk-beýläk dörüp, kündükleri goýdy. Soňra guşluga galyp, günorta syryp ugran güne seretdi.
— Süriňem eňmeli wagty boluberipdir-ow — diýip, öz-özi bilen gürleşdi. Soňra çatma söýelgi taýagyny alyp, süriniň öňünden çykmak üçin günbatarky egne tarap ugrady.
Suwçy goşa nowany suwdan dolduransoň, ineri urgandan çözmän çökeripdir. Iner töweregine ýaltalyk bilen göz aýlap, gäwüş çalyp otyrdy. Suwçynyň özi bolsa guýudan on ädim daşlaşyp, tirsegine direnip gyşaryp ýatyrdy. Agramy batmana ýetýän agyr gowalary sowup alaýmak aňsat iş däl. Soňabaka oňurgalaryň ýazara geliberýär. Suwçynyňam häzir “Süri gelýänçä, bilime bir dynç bereýin” diýin ýatyşydy.
Çoluk egne ýetensoň, uzak garaşdyrman, çopan aňyrdan geldi. Iki bolup mallary suwa bölüp-bölüp goýberdiler. Bir tapgyr goýberip, olaryň öňüni kesýärdiler. Bu guýynyň başynda dyknyşyk döremez ýaly, suwsuz mallar bir-birini basgylap harlamaz ýaly görülýän çäredi.
Siz ýazyjy Mämmet Seýidowyň "Kesearkaç" romanyny okamagy halaýaňyzmy?
Hawa! Elbetde, Sawyer dost! Yzynam, gaýrat et-de, ýazsana... Men çeper eser, edebiýat bilen biçak gyzyklanýan!!! Türkmen dilimizi we edebiýatymyzy ösdüreliň!!!!(90%, 9 adam)
Ýok! Gerek däl, Sawyer dost! Men rap diňlemegi, agent ulanmagy, futbol görmegi, mowzukda orsça, iňlisçe we türkçe teswir ýazmany we şol dillerde mowzuk açmany, admin bilen sögüşmegi we bir zat bolsa saýty günäkärlemegi halaýan. Maňa seniň çeper eseriňden bir köpük peýda ýok!!!(10%, 1 adam)
Arhiwiň ýagdaýy
● Doly tekst
● 45/45 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 11 maý 2012 ý. · Asyl sahypany gör ↗
Teswirler 45
Ana 10'njy plusam menden 🙂. Ellerine saglyk Sawyer. Minnetdar! Turkmenedebiyaty.com'a teklip etdinmi muny. Men boynuma alayyn shu wagt doly okamadym. Her yerden bir goz ayladym. Natanysh we unudylan turkmen sozleri kop. Esasy shu gyzyklandyrdy meni. Bashda it, col, tanka...ya ozum shu wagt tm'da bolanymdanmy namemi icim gysdy okamda. Turkmenedebiyaty.com'da dursa dashary yurtdaky turkmencilige suwsanlara has kop hayyry deger.
Sawyer, gowy eser. Nesip bolsa, doly yazyp bolanyngdan songra elektron wariantyny mening e-mailime oklarsyng-da.
Dostum sagja bol! Baryny okap cykdym. Mammet aga pahyry gowy tanayardym.Prozasyny okamak nesip etmandi. Yene bir gezek minnetdar. Mammet agan bir hasiyeti bardy. Ol oyune gelen myhmanlara yazgy yazdyrardy. Menem bir zatlaar yazypdym. Wah, shol depderler galan bolsa, shu wagt shonda 23-24 yashlarymda yazanjalarymy howes bilen okardym. Shonda Annaberdi Agabayam bardy. Ol Gurbannazar oldi, ka birlerem (adyny tutmayin) yashap yor diyip bir goshga menzesh bir zatlar aytjak boldy. Shonda Mammet aga Annaberda gaty kayyedi. Herna nace myrryham bolsa ol Mammet agan gepinden cykyp bilmeyan eken. Derrew yuwashady. Shonda Mammet aga Gurbannazaryn ogul-ogul diyip in sonunda-da ogluny gorup bilman gidendigi hakynda poyema yazjak bolyanyny aydypdy, emma yazmady. Belki, yazmmak gaty agyr dushendir. Mammet aga Gurbannazary gaty gowy gorerdi. Ozem tuys turkmen yashulusydy. Yatan yeri yagty bolsun. Bu zatlary yatladanyn, gowy turkmen prozasyny okadanyn ucin yene bir gezek sag bol. Yzynam yaz. Garashyas.
Gyzyklanyp okaýanyň üçin sag bol, dost!