Galyň rowaýaty

Bir dana gojadan soradym bir gün,
Düşündiriň atam, nämedir adat,
Bahaladýar adamzady pul bilen,
Nireden gelipdir „galyň“ diýlen zat?!

Gulçulyk döwründen galypmy ýa-da,
Bu pes adat haýsy döwrüň dowamy,
Kimkä ilki pula çalşan perzendin,
Hany atam, agtarsana jogaby!

Söýgä ýol beripdir daglar, derýalar,
Söýgiden bolupdyr bu Älem binýat,
Ýöne synman gelýän söýgiň öňünde,
„Galyň“ sözi haçan geldikä dünýä?

Barlyk döremedik bolsa ýoklukdan,
Kim günäkär döwrümiň bu oýnuna,
Hany, atam, agtarsana taryhy,
Kim alarka günäsini boýnuna

...Taryhyň ilkinji sahypalary,
Henizler bolmandyr baýlygyň güýji.
Söýgi bilen, zähmet bilen sadalaç
Ýaşalan ömürler bolupdyr süýji.

Sarpaň tutulypdyr sarpaňa görä,
Iýlip-içilişi dek işdäňe görä.
Gyzam bolsaň öz edebiň, ukybyň,
Öz ornuň bolupdyr „keşdäňe“ görä.

Durmuş guralypdyr islegňe görä,
Galyň soramandyr ene gyzyna,
Heniz açylmandyr „adatyň“ üsti,
Öňünde köpleri ýykyp dyzyna.

Minnetdarlykdanmy ýa dözmezlikden,
Gaýyn enä berilipdir bir tylla.
– Beren ak süýdüňe Taňry ýalkasyn,
Penasynda aman saklasyn, Alla.

„Ösüpdir“ düşünje, „üýtgäpdir“ döwür,
Ertir iki tylla ýetipdir sowgat.
Kakasy çykypdyr „süýthaka“ şärik,
Şeýdibem ýok ýerden döräpdir adat.

Hasaba giripdir pul bilen baýlyk,
Her kim tapdygyndan „sowgat“ edipdir.
Galňap-galňap şol näleti sowgatlar,
Biziň döwre „galyň“ bolup ýetipdir.

Bu döwrüň oýny däl, bu nebsiň oýny,
Bu oýunda süýt däl, namys goýulýar.
Namys satlyk däldir, galyňam adat,
Adaty hormatlan söýýär, söýülýär.

Ömür bir oýundyr öz-özüň bilen,
Bu oýunlaň synçysydyr döwürler.
Söýüň, söýseň bu ajaýyp zamanda,
Galyň – sowgat galyň Söýgä öwrüler!

Allamyrat SAZAKOW
Donesk, 1983 ý.