Ýalñyzlyk....

Ol maşgalanyň ýeke perzendidi. Bir ýaşyny dolduranynda gürlemäge başlapdy. Ilkinji öwrenen sözi bolsa, oňa dünýäde iň eziz bolan mähribanynyň ady bolupdy: “Eje”…
Balajyk ejesiniň garnynda eýlenendigini bilmese-de, ejesini özünden aýyrlmaz bir parça hasaplap, onsuz durmuşy asla göz öňüne getirip bilmeýärdi. Ylaýta-da ejesiniň süýdüni emip, onuň gyzgyn gujagynda uklamak we oýananynda ýene-de onuň baş ujunda oturandygyny görmek  bolsa, özboluşly bir bagtdy.
Balajygyň bu şatlygy uzaga gitmedi. Ejesi “Gyzym bir eşretde ýaşasyn” diýip, işe ýerleşdi. Indi balajyk mundan beýläk her gezek ertir bilen oýananynda,  ony telim gezekler ogşap, kalbyna röwşenlik çaýýan ejesine derek, gurjaklary hem-de enekesini görýärdi. Bu ýagdaýda gyzjagyň edip biläýjek ýekeje zady aglamakdy.
Balajyk bir aýyň içinde aglamazlyga-da öwrenişipdi. Ol  demsaýyn ejesini ýatlap, ol  gelýänçä telewizoryň başynda wagtyny geçirýärdi.
Kakasy hem oňa sowuk garaýardy. Asla ýüz berenokdy. Şonuň üçin hem, onuň ýaraly kalbynyň ýeke-täk tesellisi ejesidi. Emma indi ejesi hem gelip-gelmänkä nahar taýýarlamak bilen bolýardy. Howul-hara iýdirip-içirip, ony otagyna ugradýardy. Balajyk bolsa ýene-de aglamazlyga çalyşýardy. Bir wagtlar ejesinden eşiden hüwdülerine hiňlenip, ýekeje özi otagynda uklap galýardy.
Iki ýaşa aýak basanynda, ejesi oňa kapasada bir guş satyn alyp beripdi. Kapasadaky guşjagaz oňa güýmenje bolýardy. Ýüzünden gar ýagýan enekesine derek, indi ol şol guşjagaz bilen gürleşýärdi.
- Ejem işe gitdi, ejem işe gitdi…- diýip, hergiz guşjagazy bilen derdinişýärdi. Ejesi bilen kakasy bolsa iş bilen garabaşyna gaýdy. Bir gün kapasa açyk galypdyr. Şonda guşjagaz hem ony taşlap uzak diýarlara uçdy gidiberdi. Guşjagazyň uçup barýanyny gören gyzjagazyň didesinden iki damja ýaş togalanyp gaýtdy. Gözden ýitip barýan guşuň yzyndan garap durşuna:
– Guşjagaz hem işe gitdi, guşjagaz hem- diýip aglady.