Süýdüñ hatyrasyna.....

Ol gapy-gapy aýlanyp zat satardy. Şol gün ol hiç zat satyp bilmändi. Aşgazanyny açlygyň  gemirişi ýaly, umytsyzlyk hem onuň ruhuny gemrip barýardy.  Ol indi kakjak ilkinji gapysyndan iýer ýaly bir zatlar soramagy ýüregine düwdi.
Ýöne kakan gapysyny mähirli hem-de ýaşajyk bir gelin açanda birbada utanypdy. Iýer ýaly zat sorap bilmän:
- Bagyşlaň, içer ýaly suw berip bilmezmisiňiz?- diýdi.
Ýaş gelin oglanjyga bir käse süýt hödür etdi.
Oglanjyk süýdi heziller edip içeninden soň käsäni ýaş gelne uzadyp:
- Size örän minnetdar. Size näçe tölemeli? –diýip sorady.
Ýaş gelin ýylgyryp:
- Pul gerek däl. Ejem maňa birine ýagşylyk edeniňde, ondan hiç zat hantama bolmazlygy öwretdi- diýdi.
Oglanjyk oňa köp-köp sagbolsun aýdyp, yzyna dolandy. Onuň bedenine-de ruhuna-de güýç gelen ýalydy.
 Ýyllar geçdi. Ýaňky ýaş gelin juda seýrek duş gelýän kesele duçar boldy. Obadaky lukmanlar çäre tapman, ony şähere iberdiler.

Şäher hassahanasynyň lukmany täze gelen hassanyň haýsy obadan gelenini eşidip, tisginip gitdi. Ol hassanyň ýanyna barýarka has hem tolgundy. Ol indi ýaş däldi, ýöne Lukman welin ony gören badyna tanapdy. Bu, ençeme ýyllar mundan ozal özüne mähir bilen ýüzlenen aýaldy.  Lukman ol aýalyň janyny halas etmek üçin elinden gelenini gaýgyrmandy. Bir hepde soň ol aýal keselden doly saplandy.
Lukman öňünde goýulan hasap kagyzyna göz aýlady-da, aşagyna bir zatlar ýazyp, ony aýalyň otagyna iberdi.
Ol aýal gutulanyna begense-de, özüne çykan çykdajynyň mukdaryny görkezýän kagyza seretmäge gorkýardy. Ol indi galan ömrüne şol bergini üzmek için işlemeli boljakdygyny bilýärdi.  Ahyry ol hasap kagyzyna seretdi. Kagyzda: “ Siziň bar çykdajyňyz bir käse süýt bilen bireýýam üzlüşipdiňiz.” diýen sözler ýazylgydy.