Gorasyn!!!

Salam hormatly agzalar! Men Aşyk Hoja diýen şahyryň "Gorasyn" atly goşgusyny siziň dykgatyňyza ýetirmekçi. Bu goşgyny aýdym edip özüniň 47-nji albomynda talantly bagşy Nurmuhammet Meredow ýerine ýetirýär. Aýdyşlaryna görä, Aşyk Hoja bu goşgusyny gazamatdaka ýazypdyr. Ertesi gün hem oňa ölüm jezasy berilýän eken. (Merhuma iman baýlygyny dileýän!) Bu goşgynyň original, doly nusgasy 25 bent (kuplet) töweregi bolmaly, emma gynansak-da, bu aýdymda goşgynyň bary-ýogy 12 benti aýdylypdyr. Ýene bir gynanýan zadym, ol hem men bu goşgynyň kitapda ýazylanyny görmedim. Men bu aýdymy diňläp, goşgynyň many-mazmumyndan täsirlenemden soň, size ýetirmegi makul bildim. Gynansagam, aýdymyň käbir sözleri çylşyrymly aýdylansoň, düşünmesi kyn boldy. Netijede, käbir sözleri dogry ýazmadyk bolmagym mümkindir. Eger-de, araňyzda kimde-kim meniň goşgyda dogry ýazyp bilmedik sözlerimi ýazsaňyz, men sizden diýseň hoşal bolardym. (Dogry ýazyp bilmedik sözlerimiň aşagyny çyzýandyryn).

Gorasyn!

Sözi: Aşyk Hoja
Ýerine ýetirýär: Nury Meredow

Hemmejesin aýtmaýyn,
Sizi gaýga goýmaýyn.
Hakydasyn bozmaýyn,
Gorasyn garamatdan.

Öljegiň bilmek erbet,
Jan çykman gider gurbat.
Başa düşdi kyýamat,
Belki jaýyň jennetden...

Nesip ýokdur, ýüz görmek,
Razylaşyp jan bermek.
Ýetdirmez kepen geýmek,
Düşürmezler tabytdan.

Janym beren Jan Alla,
Goýmaweri bu halda.
Ýa Jebraýyl sen golda,
Gutargyl garamatdan.

Ýatyrdym men ukuly,
Girdi düýşüme Aly.
Goly hümmet hasaly,
Doldy dünýä gudratdan.

Düýşümde Artyk işan,
Otyr gaşymda turman,
Çagyr ýeterin hökman,
Diýdi ýyndam elwasdan.

Magtymguly Pyragy,
Berdi maňa soragy.
Diýdi sözüň ýaragy,
Ýykar duşmany atdan.

Gördüm Garataý danany,
Sahawatly jenany.
Okap gitdi sogaby,
Ses etdi müň jesetden.

Aşyk Hoja, akýürek,
Namys üçin jan gerek,
Goç ýigide ýurt gerek,
Ölse çykmazmyş ýatdan.

Kelläm Hazar dek güwlär,
Içim düwlär, bek towlar.
Baky yzym ýel towlar,
Nam-nyşan ýok zürýatdan.

Türkmen gaýrasy Ahal,
Ol arassa günbatar.
Ajy ykbally bu mahal,
Ady çykdy ymmatdan.

Şeýle iliň ogly men,
Niýetim düzüw dogry meň.
Indi goly bagly men,
Nyrhym arzan aç itden...