GEÇEN GURBANLYGYŇ SORAGY

Men näme üçin o hakda hiç zat aýdyp bilemokkam? Çagajygyň goşgyny ýat tutup, halkyň öňüne çykmaly bolanda-da sakynyp durşuna meňzeýär meniň bolşum. Sen bir goşguny doly bilýärsiň. Sözme söz ýat tutupsyň. Ýöne aýdyp bileňok. Şeýle ýagdaýlarda men köplenç özümiň ýat beklän goşgumy „bilemok“ diýip hasap edýärin. Ünsümi başga zada sowup, soň gaýtadan şoňa topulýaryn. Bilýäniňi, bilmeýän ýaly bolup gaýtadan öwrenmek kä halatlarda ynsan ruhuna üýtgeşik duýgular eçilýär. Hawa, men bulary näme üçin aýtdym? Aýdyp bilmeýän, has dogrusy beýan etmesi kyn bolan bir hakykaty siziň bilen nädip paýlaşjagymy bilmämsoň, nireden hem bolsa bir ýerden başlamak gerek diýip, ýeňimi çermedim-de işe girişdim. Galany bolsa Allahyň işi.
 Gurbanlyk hakda sözlemek meniň janymy şular ýaly gul-gula salýar. Ýöne bu ýerde meni horlaýan diňe wyždanymdyr. Men Gurbanlygyň näme diýmekliginem bilýärin. Nädip Gurbanlyk edilýäninem bilýärin? Gurbanlykda nähili mal soýmalydygynam bilýärin... Hawa, bilinýän ýa-da bilinäýmeli zatlar juda köp. Bularyň arasynda men diňe özümiň şu ýaşyma deňiç, durmuşyma siňdiren, durmuşyma reňk beren parçalaryny aýdasym gelýär. Hälden bäri, şonuň üçin gara başyma gaý bolup otyryn. Adam özüniň ynsanlyk mertebesini saklajak bolsa, agzyndan çykýan her sözüne ilki bilen ýüreginden ejaza almaly diýen pikirim bar. Belkem, meniň özümden çakdan aşa talap ediji bolmagymam ahmal. Özüňi terbiýelemäge gezek gelende çakdan aşalygyň zyýany ýokmuka diýýärin.
 „Gurban“ sözüniň manysy „ýakynlaşmak“ diýmek. Men muny öňem bilýärdim. Muny bilýärin diýip hondanbärisi bolýan özüme „Nämä ýakynlaşmak?“ diýibem sorasym gelýär. Köp bilmişsireýän özümiň şu gezek dili tutulan döndi. Hawa, ýene-de şol – sakynyp goşgusyny okap bilmeýän çagajyk içime doldy oturyberdi. Hälden bäri pelsepe otarýan men „Gurbanlygyň nämä ýakynlaşmakdygyny“ bilmän durun. Wah, şu wagt ýüregimi mäjerläp, täzeden ýerine oturdyp bolsady. Ruhuma ýolbeletlik edýän ýüregimi elimi alyp: „Indi gaýdyp şuny ýadyňdan çykarmagyn: Gurbanlyk diýmek, seni we ähli barlygy ýaradan Beýik Biribara ýakynlaşmakdyr.“ diýip bilsedim. Belkem, şeýdip aýdanymda Gurbanlygyň hakyky manysy meniň ýüregime siňip, o taýdanam tutuş süňňüme ýaýrardy. Şonda, men içimiň nurdan dolandygyny görerdim. Ynsanyň içiniň ýagtylanmagyň onuň daşynyň ýagty bolmagyndan has zerurdygyna düşünmegi, gör nähili bagty, hem-de gör nähili süýji jebir. „Dert ile bu ýüregim her lahza ah kyldy niçe“ diýýän şahyryň beýikligem şondan gaýtmaýarmy näme?
 Hakykat ýene-de hakykatlygyna galýar. Göwher daşy zibilde ýatanam bolsa, ýene-de göwherligine galýar. Daşdan ýasal ajaýyp sungat eserine düşünmeseň, o bir duran tagaşyksyz daşdyr. Daşy ajaýyplyga göteren şoňa siňdirlen zähmet bolşy ýaly, ynsany hem tutuş älemiň göwher jygasyna öwürjek zat – onuň öz-özüni ýonmagydyr. Ynsan bu dünýä ýonulmak üçin, kemillige ulaşmak üçin gelipdir. Şonuň üçin, gökden gelen perman bolan – Gurbanlyk hem ynsanyň mertebesini ýene bir gez beýgeltjek amallaryň biridir. Onuň ähmiýeti, onuň gelip çykyşy barada köp zatlaram aýtsa boljak. Ýöne adam ilki bilen özüne şu dessuryň beýik Ýaradandan gelendigini bilmelidir. Allahyň buýrany üçin berjaý edilen Gurbanlygyň ynsan ruhuny nähili aramlyk eçilýäni söz bilen beýan edip bolmaýar. Ony diňe ýaşamak gerek. 
 Ata-babalarymyz şu dessuryň ynsany hakyky bagtyň sakasyndan eltýänini bilenleri üçin, Gurban baýramynda hiňňildik dikip, uludan toý tutupdyrlar. Beýik Biribaryň öňünde gurbanlyk borjuny berjaý etmäge gurbaty bolany üçin, ynsanam şol gün şatlanyp, şadyhorram bolasy gelýändir. Şol gün ynsanyň ruhy sermest bolup, özüniň ten kapasasynda çykyp, syrly älemlere bakan ganat baglap uçasy gelýändir. Belkem, şonuň üçin adamlar hiňňildigiň bady bilen ruhlaryna teselli berýändirler.