Güýz bilen söhbet. G.Ezizow

Syr alyp syr berishýän
Söwer dostuma meñzäp,
Kakdyñ ýene gapymy,
Meniñ paýhasly güýzüm.
Ýene duýgy köñülde
Oýnady müñzäp-müñzäp,
Duýgulañ agramyndan
Epilip barýar dyzym.

Güýzüm! Güýzüm! Sen edep,
Sen bir nusga, sen many.
Açýan seniñ öñüñde
Syrlarymyñ baryny.
Sen dumanly topragyñ
Hem çal siñen asmanyñ,
Bile meniñ köñlüme
Saçýañ paýhas nuruny.

Düshünýärsiñ: güýz pasly
Ahyrýet däl, öçmek däl.
Sowap barýar asmanda,
Ýogsa, hanha sary Gün.
Güýz diýlen-sahylykdan,
Nur eçilmekden nyshan,
Biziñ mydama sahylyga,
Nura mätäç jahanda.

Düshünýärsiñ: shöhratsyz,
Ýörenlere shan-shöhrat,
Atsyzlara oñat at,
Tapsyzlara tap berseñ.
Maksatsyzlara maksat,
Myratsyzlara myrat,
Köñülleri körlere
Bir dana kitap berseñ.

Seljerseñ görip meýin
Dosty-ýaryñ meýinden,
Ynsap, hakykat bolsa
Ähli baýlygyñ-malyñ.
Sözler birden ýarylsa
Ýürekleriñ teýinden,
Güýzän güýz ternelerniñ
Täsin ýarylshy ýaly.

Güýzüm! Güýzüm! Gijeleñ,
Shemal shuwlap geçende,
Birden düshýär ýadyma
Neresse dosty-ýarlam.
Gör olañ näçesi ýok
Az salymyñ içinde?!
Shoñ üçin gadryn bilýän
Shindi jahanda barlañ.

Törpüle sen duýgymy,
Goý, inçelsin-men kaýyl.
Bolsun ýakynyñ ýadyñ
Agysyna dözümsiz,
Seniñ görküñe maýyl,
Seniñ erkiñe maýyl
Günlem shatlykdan ýaña
Goý, üzülse üzülsin.

Ýapraklaryñ basgylap,
Ýuwash ädimläp barýan.
Shuwwuldaýar gam bolup,
Çigrek shemal shahada.
Güýz diýen sahylykdan,
Nur eçilmekden nyshan.
Biziñ mydam sahylyga
Nura mätäç jahanda.