ATAJAN ANNABERDIÝEWDEN IKI GOŞGY
BILIPDIR
Gam-gussasyz çagalygmy tapmaryn,
Tapman senem ene ýabyň boýundan.
Birçak biz çagakak, her dürli gurjak
Ýasardyk eýlenen, gyzgylt toýundan.
Dolsa-da, gurjakdan şowhunly güzer,
Diýerdiň sen: "Ýene birin ýasaly!"
Şol gün sen ýasadyň bir garry aýal,
Küýkerip durdy ol eli hasaly.
Menem ýasapdym bir keltejik goja,
Durdy olam bir goltugy pişekli.
Ýylgyryp hem: "Özüňizm-eý ol?" diýip,
Sorapdy bir otdan gelýän eşekli.
"Ýok, ýok" diýip, gygyrşypdyk şonda biz,
Gidiberdi olam diýip: "Bor onda".
"Hawa" diýip jogap beren bolsagam
Boljak eken şol eşekliň soragna.
DOSTUMA
Çykar indi gam-gussaňy köňlüňden,
Tutma nalap şowsuz söýgiň ýasyny.
Ilden-günden gizlejek bol, özüňden
Gizläp bilmeseňem gözleň ýaşyny.
Gyz gyt däldir, bolar ýene näz eden,
Ol söýmese, söý saýla-da başgasyn.
Gordan doly gursagyňda täzeden
Yşgyň ody tüweleýläp başlasyn.
Şeýle derde duçar bolup öň menem
Diýipdim: "Heý, oň ýaly gyz tapdyrmy?"
Ömür bormy, durmuş bormy ondanam
Bir kejir gyz çözüp dursa takdyrňy.
Gör dörjeläp kalbyň ýyljak külüni,
Bardyr közem, şonsuz gurak boş gapdyr,
Gör-ä erik seçip otyr gülüni,
Alma bolsa ýaňy gülläp başlapdyr.
Gaýtadan söýmäge çatar seň gurbuň,
Goruň bar-a, öçen däldir közüňem.
Ynha, göräý, ýada salyp soň bir gün
Bu bolşuňa geň galarsyň özüňem.
Ol gyza-da diý: "Men senden hoşduryn",
Ýokdur agaç ýa ot güli solmaýan.
Ýokdur munda ýeri oýlup boş duran,
Ýokdur öwezini dolup bolmaýan.
Arhiwiň ýagdaýy
● Doly tekst
● 23/23 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 23 iýun 2012 ý. · Asyl sahypany gör ↗
Teswirler 23
haladym. Sagbolun
Gowy goşgular sagja bol.👍
Gowy goshgy. Sag bol paylashanyñ un. +
haladym
gowja goshgular manyly sagja bol
şahyryň goşgularyndan ýene-de goýsaň hoşal bolardyk.
Dostum, Galam...! Atajan agaň sende goşgular kitaby ýokmy? Mende bardy welin, biri okamaga alyp gidip, ýitiripdir. Käbir goşgularyny ýatdanam bilýän, ýöne bilmeýänim kän, bar bolsa 2-3 goşgusyny saňa haýyş edäýjekdim.
Birinji goşgudaky gussa hem pelsepä kim nähili düşündi? Pikiriňizi ýazyp bilmersiňizmi?
mende sesli goşgulary bar. öz okamagynda däl.
Düşmeris ahyry aýra biz baky -
Diýipsiň - Bugdaýlar bireýýäm bişdi.
Hatyňy okamda gaýramyzdaky
Bugdaýly meýdanlar ýadyma düşdi.
Atajan agaň şu goşgusyny kim bilýän bolsa, gaýrat edip şu ýere goýup bilmezmikä? Yzy teý ýadyma düşenok. Şu goşgudaky ýaly owaza, dinamika türkmen edebiýatynda başga hiç bir şahyrda duşmadym.
Dostum, Galam...! Şolardan birki sanysyny tekst görnüşinde şu ýere goýup bilermiň?
Ol günler bireýýäm uzakda galdy,
Ondan soň erikler dökdi gülün kän.
Ýadymda galypdyr başyň mahmally
Akar ýapdan suw daşardyň gelinkäň -
diýip başlaýan goşgusy hem bolmaly. Bar bolsa, gaýrat edip goýuň, okalyň!
Atajan aga 2-3 ýyllykda dünýäsini täzeledi. Türkmen okyjysy entek bu ýitginiň yzasyny duýanok.
TORGAÝ
Sary saçyň kültemine
Meňzäp ýatyr bede, ýerde.
Bir torgaýjyk gaýmalap ýör,
Ol biçäre karar tapýar
Ne asmanda, ne-de ýerde.
Dar görýär torgaý obany,
Gür bagy, ir-iýmişligem.
Wah, torgaý jan, biz nädeli
Eger sen dar görýän bolsaň,
Şu biserhet giňişligem.
GÜÝÇ
Deňziň güýji derýa bagly
Derýäň güýji ýagyş gara
Joşýar derýa doňan gary
Gün edensoň pagyş-para
Il täleýi merde bagly
Ýürek beýniň permanyna
Ynjy-yza derde bagly
Derdiň güýji dermanyna
Guran agaçlaň güýji bar
Oduň güwläp ýanyşynda
Puşman, ahmyr hem ünji bar
Adamlaryň ýalňyşynda
Planetalaň çekiş güýji
Bagly bolýar aralyga
Joşgun, hyjuw söýgä bagly
Söýgiň güýji aýralyga
ÝAŞAMAK
Gorky-ürküsiz ýaşadym,
Ýaşadym daşym galasyz.
Ynanyň, Ol ýok diýseler,
Ýöne ynanmaň hiç haçan
Diýseler: Sansyz-salasyz.
ÖZÜŇE YNANMAK
Ilden bitmedik möhümiň
Döreder bir kinejigi.
Çalymdaşdyr düwünmänkä
Oň kök uran şinejigi.
Duýdansyz başyňdan inen
Bir bilniksiz ingidir ol.
Iýip başlar-da içiňden
Ýuwaş-ýuwaş igleder ol.
Şeýder-de synar kem-kemden
Özüňe bolan ynamyň.
Diýersiň: Söýýän men ili,
Kalbym päkize, ynanyň!.
Parhsyz däldir, dil ujundan
Diýen bolar: Il aglama!
Başarsaň özüňden başga
Hiç bir kimsä bil baglama!
ÖKÜNME
Ökünme sen maňa sataşmanyňa
Hem galma yzymdan ogryn garap sen
Bu dünýäde oňat adamlar kändir
Bilersiň mensizem başyň çarap sen
Janymyz sag, hazir ikimizede
Geregi ýok arkadagyň, diregiň
Esasy zat bolsa öýünde däl-de
Kalbynda ýaşamak birek-biregiň
Galam..., dostum, sag bol, Taňyrýalkasyn!
👍